قصيدة توجد لابن حمود السبيل

يالله ياللي تسجـد النـاس لرضـاه
ياوامـر خلقـه علـى حـج بيتـه
تفرج لمن سده على الناس ما ابداه
راضي على مقسومك اللي عطيتـه
من شن يسل الحال والجسم يبـراه
والنـاس مايشفونـه إن ماشفيـتـه
قلت آه واجرحـاه مـن خلتـي آه
وإن حملونـي حمـل غـي قويتـه
قالوا سفا بالحال ويش اللي أغـواه
قلت آه ويش المنكر اللي وطيتـه؟
قالوا جهلت وبـان علمـك لمنهـاه
قلت آه علمـي يامـلا مـا كميتـه
قالوا طلبنـا لـك مـن الله معافـاه
قلـت آه وحدتـه وعفـوه رجيتـه
قالوا هله وأحباب عينـه نصحنـاه
قلـت آه هـذا واردٍ مـا بغيـتـه
قالوا ندور لك من البيـض حليـاه
قلت آه لـو غيـره بكفـي رميتـه
قالوا نشاش العـود مالـك بلامـاه
قلت آه عود المـوز بإيـدي لويتـه
قالوا تـزوج كـود تدلـه وتنسـاه
قلت آه لو خذت أربع مـا نسيتـه
قالوا من أقصى الناس وين أنت وياه
قلت آه ما أنسى يوم جاني وجيتـه
قالـوا نشوفـه عنـد هـذا وهـذاه
قلت آه عمره ماعقب حجـر بيتـه
قالـوا عليـلٍ ناقلـن داه بــرداه
قلت آه بأقرابـي وروحـي فديتـه
قالـوا نشيـر ولا نفـع ماحكينـاه
قلـت آه هـراج النمايـم عصيتـه
قالوا كثـر شيبـك وقلبـك بعميـاه
قلت آه لـو قلبـي غريـر نهيتـه
مطـاوعٍ قلبـي بعجفـاه وإقــداه
وإلى عطى منهـاج دربٍ عطيتـه
يانـاس خلـوا كـل وادٍ ومجـراه
قلتـوا كثيـر وقولـكـم مالقيـتـه





الـــشـاعــر الــوجــدانــي
عبدالله بن حمود بن سبيل