ولاد الاباعد

dr.nor · الاحد يناير 27, 2008 7:04 pm

مساكين ولاد الاباعد اللى جابوا مجاميع
سهروا الليالى الطويله واتقطعوا تقطيع
مابين الدروي الخصوصى او شاشه فيها مذيع

********
شلنا الورق وجرينا من بدرى ع التنسيق
والكل كان منهمك فى القص والتلصيق
والطب كان الهدف واحلامنا ساعه الضيق

*******
سبع سنين بهدله شفوى وتحريرى
فاكرين طريق الغنى فى وظيفه م الميرى
والخمسه عين اه ياعينى كانت هى تبريرى

*******
البالطو الابيض لبسنا ووقفنا فى استقبال
فاكرين حياتنا صفت واتبدلت الاحوال
مدينا ادينا فى جيوبنا مالقينا حتى ريال

*******
ولما اخدنا الشهاده قلنا خلاص نرتاح
نرحم شقا اهلنا طول عمرنا الى راح
والقرش يجرى فى ايديه وابقى طبيب جراح

*******
وفى يوم خبيتنا التقيله رحنا حدا الصراف
علشان نجيب الماهيه ونعيش عزاز اشراف
لقيناها مابتسقى ميه ولا شبشبين نضاف

*******
البعض عند عياده فعلا ودخله كبير
والبعض عند عياده لكن بدون توفير
والباقى ريح دماغه وراضى يبقى فقير

*******
وراح العمر ولاح الشيب فى كل الراس
ماعندى بيت ولا عروسه وزى الناس
ماضاع العمر ياولدى وضاع الحس والاحساس

*******
قوم احقنا ياراعى الصحه والسكان
وزود لينا مصروفنا نعيش فى امان
ونحيا زى كل الناس دا انا انسان